භික්ෂූන් වහන්සේලා පවා කඳුළු සැලූ මරණය

"තාත්තාගේ මරණයේදී භික්ෂූන් වහන්සේලා පවා කඳුළු සලනු මා දැක්කා ඉෂාක් බෙග්"

අල්හාජ් මොහිදීන් බෙග් ගායකයාණන්ගේ ගීතයක් නෑසෙන වෙසක් උත්සවයක්, ‍පොසොන් උත්සවයක් නැත. රට පුරා ඉදිවන තොරන්, දන්සල් වෙසක් කලාපවල සාර්ථකත්වය වැඩිකර ගැනීමට පසුබිමින් ඇසෙන්නේ ඔහුගේ ගීත ය. රට පුරා විහාරස්ථානවල බෞද්ධ වැඩසටහන්වලදී රැව් දෙන්නේ ඔහුගේ එම ගාම්භීර හඬය. තව වසර ගණනාවක් ගියද ඒ හඩින් ගැයූ බොදු ගී හෙළ බොදු සමාජය තුළ රැව්පිළිරැව් දෙනු ඇත. ඉස්ලාම් භක්තියකු වුවද මෙම විශිෂ්ට ශ්‍රී ලාංකීය පුරවැසියා මෙරට සංගීත ක්ෂේත්‍රය සහ බෞද්ධ ජන සමාජය වෙනුවෙන් ඉටු කළ උදාර මෙහෙයට කළගුණ සැලකීමක් ලෙස මේ වෙසක් සමයේ අපි ‘බෙග් මාස්ටර්’ පිළිබඳව මතකය අවදි කරන්නට සිතුවෙමු. ඒ සඳහා අප ඔහුගේ පුතු ඉෂාග් බෙග් සම්බන්ධ කර ගත්තේ මෙලෙසිනි.



ඔබේ පියා මේ රටේ වැඩිම බෞද්ධ ගී ගැයූ ගායකයෙක්. ඔබට ඒ ගැන සිතෙන්නේ මොනවාද ?

තාත්තා නිතරම කියූ දෙයක් තමයි “මේ රට සිංහල බෞද්ධ රටක්. මේ රටේ සිංහල බෞද්ධ ගී විශාල ප්‍රමාණයක් මා ගැයුවා. ඒ නිසා මේ රටේ හැමදාම මගේ නම පවතීවි” කියන එක. ඒ යුගයේ බිහිවූ බොහෝ චිත්‍රපටවල සිංහල බෞද්ධ ගීවලට තාත්තාගේ හඬ අතිශයින් ගැළපුණා. ඒ නිසා එම ගීත සඳහා තාත්තාව යොදාගත්තා.

ඔහු ඒ සඳහා ඉදිරිපත් වුණේ කැමැත්තෙන්මද ?

ඔව්, තාත්තාගේ හිතෙත් ඒ ගී ගැන විශාල පැහැදීමක් තිබුණා. සරල ගී වැඩසටහනකදී පවා එක බෞද්ධ ගීතයක් හෝ ඇතුළත් කරන්න තාත්තා අමතක කළේ නැහැ. ඒක හුඟක් සිංහල ගායකයන් පවා නොකළ දෙයක් “සුව දේ මට සීතල සුළඟ පවා” ගීතය තාත්තා ගැයූ සරල ගීයක්.

මේ මහා ගායකයාණන් තුළ බොදු දහම ගැන දැනීමක් තිබුණාද ?

තාත්තා ඉපදුණේ ඉන්දියාවේ. ඒ හින්දා ලුම්බිණිය, බුද්ධගයාව, කුසිනාරාව වැනි ස්ථානවල තියන වැදගත්කම ගැන තාත්තා දැනගෙන හිටියා.

සිංහල බෞද්ධ ගීත ගැයීම පිළිබඳව ඉස්ලාම් ආගමික සංස්කෘතියෙන් පියාට විරෝධතා එල්ල වුණේ නැද්ද ?


විරෝධතා එල්ල වූ අවස්ථා බොහොමයක් තිබෙනවා. තාත්තාගේ බෞද්ධ ගී අතුරින් ඉහළම තැන තියෙන ගීතය විදියට සලකන්නෙ “ඔබේ රාගී මන කැළඹේදෝ” ගීතයයි. එහි මුල් හින්දි ගීතය ගැයූ මන්නාඩේ පවා තාත්තාට විශේෂ ප්‍රශංසාවක් කළා. අදත් ඒ ගීතය වෙසක් ‍පොහෝදාට ලංකාවේ හතර දිග්භාගයෙන්ම ඇසෙනවා. අපේ ආගමික කණ්ඩායම් මගින් තාත්තාට වැඩියෙන්ම බැණුම් අසන්නට වුණේ එම ගීතය ගැයීම හින්දා. නමුත් ඒක මුළු මුස්ලිම් ජනතාවම එල්ල කළ විරෝධයක් නොවන බවත් විශේෂයෙන්ම කිව යුතුයි.

මොකක්ද ඒ ගීතයට විරුද්ධ වීමට හේතුව ?

ඒ ගීතයේ මැද කොටස්වල තියෙනවා “එම විට පවසනු මුවින් ඔබේ; බුද්ධං සරණං ගච්ඡාමි” කියලා. ජීවිතය වෙනසකට යොමු වන හැමවිටකම “බුද්ධං සරණං ගච්ඡාමි” කියන්න කියන පණිවිඩය එතනින් දෙනවා. අපේ ආගමෙත් කියන්නේ එවන් අවස්ථාවල අල්ලාගේ පිහිට යදින්න කියා. වෙනත් ආගම් ඇදහීම අපට තහනම්.

කොහොමද ඒ විරෝධතා ක්‍රියාත්මක වුණේ ?


තාත්තා පල්ලි යනකොට “ඔය පව්කාරයා ඇයි පල්ලියට ගන්නේ” කියූ අයත් හිටියා. තවත් අය තාත්තාගේ මූණටම “ඔය විදියට හම්බ කරලා
ළමයින්ට කන්න දුන්නට ඒවා දිරවයිද ... ?” කියා ඇසූ අවස්ථා තිබුණා. තාත්තා හරිම අහිංසකයි. කවමදාකවත් ගැටුම් ඇතිකරගත්ත කෙනෙක් නමෛයි. කවුරු මොනවා කිව්වත් මුකුත් නොකියා බිම බලාගෙන හිටියා. ඒ බවත් කියන්න ඕනේ. ඒවාට උත්තර දෙන්න ගියේ නැහැ. නමුත් තාත්තාගේ ඒ ගීත අගය කරපු මුස්ලිම් අයත් හිටියා.

බෙග් මාස්ටර්ගේ ඉස්ලාම් ආගමික භක්තිය කෙහොමද ?


රෑ දොළහට සංගීත සංදර්ශනයකට ගිහින් ආවත් හැමදාම පාන්දර තුනට නැගිටලා දෙවියන් වඳින එක තාත්තාගෙ සිරිතක්.

කොහොමද ඔහු අඹු දරුවන් ගැන දැක්වූ උනන්දුව ?


අපි ඉස්කෝලෙ යනතුරු ඒ ගැන සොයා බලනවා. අම්මටයි අපි අට දෙනාටයි හරිම ආදරෙයි. දරුවො අට දෙනාගෙ වැරැද්දක් දැක්කම අවවාද දුන්නට දඬුවම් කරන අවස්ථා අඩුයි. මගෙ ජීවිතේදීම තාත්තා දැඩි ලෙසින් කෝපයට පත්වූ එකම එක අවස්ථාවක් විතරයි මම දැක්කේ. ඒ මා සම්බන්ධ සිදුවීමක්.

මොකක්ද ඒ සිදුවීම ?


ඒ වෙද්දි මට වයස දොළහක් විතර ඇති. මමයි මිතුරෙකුයි බස් එකේ එද්දී මම ටිකට් ගන්න මිතුරාට සල්ලි දුන්නා. එයා එයාගෙ ටිකට් එක අරගෙන මම දුන්න සල්ලි සාක්කුවේ දාගෙන. ටික දුරක් යද්දී ටිකට් පරීක්ෂකවරු බස් එකට නැග්ගා. මිතුරා මගහැරලා ගියා.
මාව ‍පොලීසියට අරගෙන ගියා. ටික වේලාවකින් තාත්තා ‍පොලීසියට ආවා. තාත්තා ඒ වෙලාවේ මගෙ පැත්තට කතා කළේ නෑ. “ටිකට් නැතුව ආපු කොල්ලො ‍පොලීසියට තමයි ගෙනෙන්න ඕන” කියලා ඒ නිලධාරීන්ට ප්‍රශංසා කළා. ඊට පස්සේ එතැනදීම මට ගැහුවා. ගෙදරට ඇදගෙන ආවෙත් පහර දිදී. හවස් වරුවේ තාත්තා මාව ළඟට අරගෙන “ඇයි පුතේ මම බොහොම අමාරුවෙන් ගොඩනගාගත්තු මොහිදීන් බෙග් කියන නම විනාශ කළේ” කියල මගෙන් ඇහුවා. ඒ වෙලාවේ තාත්තගේ ඇස් දෙකේ කඳුළු පිරිලා තිබුණා.
දඬුවමකට වඩා මගෙ හිත කම්පා වුණේ ඒ වෙලාවේ. ඊට පස්සේ කවදාවත් මම ඒ විදියේ නරක යාළුවෝ ආශ්‍රය කළේ නැහැ.


අල්හාජ් මොහිදින් බෙග්ට ශ්‍රී ලංකාවේ පුරවැසිභාවය ලැබිමත් විශේෂ සිදුවීමක්.

තාත්තා මුලින්ම ලංකාවට ඇවිත් තියෙන්නේ හමුදා සේවයට. ඉන්පසුවයි ගී. ගායනයට එකතු වණේ. දෙදහස් පන්සියයේ බුද්ධ ජයන්තිය නිමිත්තෙන් පැවති උත්සවයකදී තාත්තා ගී ගැයුවා. අග්‍රාමාත්‍ය එස්.ඩබ්.ආර්.ඩී. බණ්ඩාරනායක මැතිතුමා එතැන හිටියා. නිවේදන කටයුතු කළ කරුණාරත්න අබේසේකර මහතා අමතලා බණ්ඩාරනායක මැතිතුමා තාත්තාගේ ගායනාව ප්‍රශංසා කරද්දී කරුණාරත්න අබේසේකර මහතා කියලා තියනවා “සර් තවම ඔය මනුස්සයට ලංකාවේ පුරවැසි භාවයවත් නැහැ” කියලා. ඒ මොහොතේම අගමැතිතුමාගේ මූලිකත්වයෙන් ගෞරවනීය විදියේ පුරවැසිභාවයක් තාත්තාට ලැබුණා. ඉන්පසු එවැනි සම්මාන පුරවැසිභාවයක් කිසිම ඉස්ලාම් ජාතිකයකු ලබලා නැහැ.

බෙග් මාස්ටර්ගේ අවමංගල්‍යයට සංඝරත්නය පවා සහභාගි වුණා නේද ?


ඉස්ලාම් ජාතිකයකුගේ අවමංගල්‍යයකට භික්ෂුන් වහන්සේලා වැඩමකළ අවස්ථාවක් මා දැක නැහැ. එදා දෙමටගොඩ මුස්ලිම් සුසාන භූමිය එකම හිස් ගොඩක්. ඒ අතරින් සියයකට අනූවක් විතර හිටියේ සිංහල බෞද්ධයෝ. තාත්තාගේ මරණය සම්බන්ධයෙන් භික්ෂුන් වහන්සේලා පවා කඳුළු සලනු මා දුටුවා. අපේ ආගම අනුව කෙනෙකු මියගිය පසුව පැය කීපයකට වඩා තියාගන්න බැහැ. තාත්තා මිය ගිහින් පැය පහකින් අවසන් කටයුතු කළා. තවත් වෙලා තිබුණා නම් පැමිණෙන සෙනඟ දහ ගුණයකටත් වැඩිවෙයි.

මොන තරම් දැවැන්ත ජනප්‍රියත්වයක් කීර්තියක් හිමි කර ගත්තත් පෞද්ගලික ජීවිතයේදී බෙග් මාස්ටර් අගහිඟකම්වලට මුහුණ දුන්නා නේද ?

කලාවට තියෙන ආදරේට කලාවට එන අය ඉන්නවා. මුදල් හම්බ කරන්න කලාවට එන අයත් ඉන්නවා. තාත්තා කලාව කළේ ඊට ඇති ආදරයට. ඒ හින්දම හම්බ කරපු දෙයක් නැහැ. අපි බොහේ ප්‍රශ්නවලට මුහුණ දුන්නා. සමහරදාට ලයිට් බිල ගෙවන්න නැතුව වතුර බිල ගෙවන්න නැතුව ඒවා කපන්න නිලධාරීන් එනවා. “පුතේ මමයි මගෙ නෝනයි දරුවොයි කළුවරේ ඉන්නෙ කොහොමද ? වතුර නැතුව ඉන්නෙ කොහමෙද ?” කියලා තාත්තා ඒ අයගෙන් අහනවා.
“කරන්න දෙයක් නැහැ මාස්ටර් බිල් ගෙවල නැති හින්දනේ කපන්න වෙන්නේ” කියල ඒ අය කියනවා. ඊට පස්සෙ තාත්තා සංගීත සංදර්ශනවලට ගිහින් සල්ලි හොයාගෙන ඇවිත් බිල් ගෙවනකම් අපි ඉන්නෙ වතුර නැතුව, ලයිට් නැතුව.

පියාගේ මරණයෙන් පසුවත් ඔබේ පවුලට ප්‍රශ්න ඇති වුණා නේද ?


තාත්තා මියගියාට පසුව දෙමටගොඩ අපි හිටපු ගේයි තවත් ගෙවල් නවයකුයි කැඩුණා මොකක්ද ලොකු ගොඩනැගිල්ලක් හදන්න. ඒත් ඒ ගොඩනැගිල්ල අදටත් හැදුනෙ නැහැ. අද එතැන කාර් පාර්ක් එකක්.

ඔබ පියාගේ ගී ගයමින් ක්‍ෂේත්‍රයට ආවා. ඔබේ පවු‍ලේ ඊළඟ පරපුරෙන් කවුද බෙග් මාස්ටර්ගෙ නම ගෙනියන්නේ ?

මම අදටත් ඉන්නෙ කුලී ගේක ඒ හින්දා මම කැමති නැහැ මගෙ දරුවෝ මගේ තාත්තා වගේ අවංක ලෙසම කලාවට ඇවිත් අසරණ වෙනවට. ඒ අයට උගන්නලා හොඳ රැකියාවලට යොමු කිරීමයි මගෙ අරමුණ. ඒත් මගෙ පියාගෙ ගී නැතිවෙන එකක් නැහැ. රියැලිටි තරගවලට එන තරුණ අය මගේ පියාගේ ගීත ගයයි. බෙග් මාස්ටර්ට උපහාර පිණිස ගැයුවා කියලා ටී.වී. එකේ කියයි. එතකොට ඒ අයට වැඩියෙන් එස්.එම්.එස්. ලැබෙයි. මුදල් යාන වාහන ගෙවල් දොරවල් ලැබෙයි.
නමුත් බෙග් මාස්ටර් තමන්ගේ දරුවන් සමග ලයිට් බිල ගෙවා ගන්න බැරිව කළුවරේ පවා ඉඳලා තිබෙනවා. ඒවා ගැන මං දැන් හිතන්නේ නැහැ. නමුත් අර විදියේ කෙනෙකු හමුවුණත් මම දොස් කියන්නේ නැහැ. අතට අත දීලා සුබ පතනවා.

ආරියවංශ කුලතිලක(Lakbima)

Related articles

• සදාචාරය සහ ආගම-Ethics and Religion
• 77066_504405576246153_964001964_n.jpg